ಮೂಕ ಶಿಲೆ

ನನಗೂ ಮನಸು
ಘಾಸಿಯಾಗಿದೆ,
ನಿನಗೂ ಹೇಳದೆ
ಮೌನಿಯಾಗಿ ಹೋದೆ.
ಗಾಯವಾದ ಹೃದಯಕ್ಕೆ
ಮುಲಾಮು ಎಲ್ಲಿದೆ?
ಗಂಧ ಗಾಳಿ ಕೂಡ
ತಂಪೆರೆಯದಷ್ಟು ಹಸಿಯಾಗಿದೆ,
ಕೆರೆದಷ್ಟು
ಹರಡಿಕೊಳ್ಳುತಿದೆ.

ನನಗೂ ಮನಸು
ಘಾಸಿಯಾಗಿದೆ,
ಸಾಂತ್ವನ ಹೇಳುವ
ಒಲವೆ ದೂರಾದ ಮೇಲೆ
ಇಲ್ಲದಂತಾಗಿದೆ
ನಿಲ್ಲಲು ನೆಲೆ.
ಎಷ್ಟು ಕುಡಿದರು ನೀರು
ಉದರದೊಳಗೆ
ಶಮನವಾಗದ ಜ್ವಾಲೆ!
ಕಳೆದುಕೊಂಡವರೆಲ್ಲ
ಹೀಗೆ ಆಗಿಬಿಡುವರೇನೊ,
ನನ್ನಂತೆ ಮೂಕ ಶಿಲೆ!

ನನಗೂ ಮನಸು
ಘಾಸಿಯಾಗಿದೆ,
ನೀ ನನ್ನ‌‌ ಅರಿಯದೆ ಹೋದೆ
ನಾ ನೊಂದೆ...
ಯಾರಿಗೂ ಹೇಳದೆ,
ಒಂಟಿಯಾಗಿಯೆ ಅನುಭವಿಸಿದೆ.
ನಾ ಬಯಸಿದ್ದಾದರು ಏನು?
ಎರಡು ಮಾತು.
ಒಂದಿಷ್ಟು ಪ್ರೀತಿ.
ದುಬಾರಿಯೆನಿಸಿತೆ?
ನಾ ಬಯಸಿದ ರೀತಿ
ಕ್ಷಮಿಸಿ ಬಿಡು
ದಡ್ಡ ನಾನು..
ಕೇಳಬೇಕಿತ್ತು
ನಿನ್ನ ಸಮ್ಮತಿ

ನನಗೂ ಮನಸು
ಘಾಸಿಯಾಗಿದೆ,
ಪದೇ ಪದೇ
ನಿನ್ನ ಆ ನಿರ್ಲಕ್ಷ್ಯಕ್ಕೆ
ಒಳಗಾಗಿ
ನನ್ನನ್ನು ಅಪರಿಚಿತನಂತೆ
ನಡೆಸಿಕೊಂಡದ್ದರ
ಫಲವಾಗಿ.
ಬೇರೆಡೆ ನಿನ್ನ
ಮನಸ್ಸನ್ನು ಹರಿಯಬಿಟ್ಟು
ನನ್ನ ಮರೆತ
ಸಲುವಾಗಿ...

ಮನಸು ತೀರ ಘಾಸಿಗೊಂಡಿದೆ,
ಇನ್ನೆಂದು ವಾಸಿಯಾಗದ ಹಾಗೆ.
ಮನಸು ತೀರ ಘಾಸಿಗೊಂಡಿದೆ
ಸದಾ ಮೂಕನಾಗೆ ಉಳಿಯುವ
ನಿರ್ಧಾರದೊಂದಿಗೆ!.

-ಕವಿಸೋನಿ