ಸುಳ್ಳೇ ಸುಖದ ತಿರುಳು

ನಿದ್ದೆ ಬಂದ ಹಾಗೆ ಮಲಗಬೇಕು ಈಗ
ಮುದ್ದಾಡಲಿ ಅವಳು
ಪೆದ್ದನ ಹಾಗೆ ಇರಬೇಕು ಆಗಾಗ
ಸುಳ್ಳೇ ಸುಖದ ತಿರುಳು
ಕಂಡರೂನು ಕಾಣದಾಗೆ
ನೊಂದರೂನೂ ನೋಯದಾಗೆ
ಅನಿಸದಿದ್ದರೂ ಏನೋ ಅನಿಸಿದ ಹಾಗೆ
ನಟಿಸಬೇಕು ಈಗ
ಆವರಿಸಲಿ ಅವಳು ಬೇಗ!

ಚಂದ್ರನುರಿದು ಬೂದಿಯಾಗಿ
ರವಿಯು ಅತ್ತು ಕಡಲನು ತಾಗಿ
ಹಸಿರು ತನ್ನುಸಿರ ಬಿಗಿಯಲಿ ಹಿಡಿದು
ಮರವು ಮುನಿದು ತನ್ನನೆ ಕಡಿದು
ಅವಳ ಮುದ್ದನು ನೋಡುತ ಮರುಗಿ
ಹೂವು ಅರಳದೆ ಮೊಗ್ಗಲೆ ಕೊರಗಿ
ಗೆಲ್ಲಬೇಕು ನಾನು!
ಅವಳ ಮುತ್ತಿನ ಮತ್ತಿಗೆ ಸೋತು!!

ನಿದ್ದೆ ಬಂದ ಹಾಗೆ ಮಲಗಬೇಕು ಈಗ
ಮುದ್ದಾಡಲಿ ಅವಳು
ಪೆದ್ದನ ಹಾಗೆ ಇರಬೇಕು ಆಗಾಗ
ಸುಳ್ಳೇ ಸುಖದ ತಿರುಳು! :)

ರೂಪಸಿ ನಿನ್ನಯ ರೂಪವೆ ಚೆಂದ

ರೂಪಸಿ ನಿನ್ನಯ ರೂಪವೆ ಚೆಂದ

ರಮಿಸಿದೆ ನಿನ್ನ್  ಅಂದ

ಮನಸ್ಸಿಗಂಟಿದೆ ನಿನ್ನ ಮೈ ಗಂಧ

ಬಯಸಿದೆ ಬಿಗಿ ಬಂಧ!

ತೂಕಡಿಸಿ ಮಲಗಿ ನಿನ್ನ ಮಡಿಲಲಿ

ಆಗಬೇಕು ನಾ ಕಂದ

ಕೆರಳಿಸಿ ಕಾಡಿಸಿ ಮನದ ಮರೆಯಲಿ

ನಗುವುದೇ ಬಲು ಚೆಂದ

                            

ರೂಪಸಿ ನಿನ್ನಯ ರೂಪವೆ ಚೆಂದ

ರಮಿಸಿದೆ ನಿನ್ನ ಅಂದ

ತಣ್ಣನೆ ಗಾಳಿಗೂ ನಿನ್ನಯ ನೆರಳಿಗೂ

ಇಲ್ಲ ಯಾವುದೇ ಭೇದ

ಹೆಜ್ಜೆಯ ಇಟ್ಟರೆ ಗೆಜ್ಜೆಯ ತಾಳಕೆ

ಹೊಮ್ಮುವುದು ಸ್ವರ-ನಾದ

ನೆನೆಯುತ ನಿನ್ನನು ಗೀಚುತ ಪದವನು

ಮೈಮರೆಯುವುದೇ ಆನಂದ!

ರೂಪಸಿ ನಿನ್ನಯ ರೂಪವೆ ಚೆಂದ

ರಮಿಸಿದೆ ನಿನ್ನ್  ಅಂದ

ಅವಳು ಕುಸುಮವು

ಹಳದಿ ಬಣ್ಣದಿ
ಮೆರೆದ ಚಂದಿರೆ
ಮಿನುಗುತ್ತಿದ್ದಳು ಚೆಂದದಿ
ನಗುತಾ ಮೆಲ್ಲನೆ
ಸೆಳೆದು ನನ್ನನೆ
ಮೋಡಿ ಮಾಡಿದಳು ಅಂದದಿ
ಕಣ್ಣು ಕಮಲವು
ಬಣ್ಣ ಕುಮುದವು
ಮೊಗವು ಅರಳಿದ ಮಲ್ಲಿಗೆ
ಗಿಣಿಯ ನಾಸಿಕ
ನಡುಗೆ ಮೋಹಕ
ನೋಡಿ ನಾಚಿತು ಸಂಪಿಗೆ
ಅವಳು ಕುಸುಮವು
ಹಂಸ ನಾದವು
ಸೂಸುತ್ತಿರಲಿ ಕಂಪನು
ದಿನವು ಸೆಳೆಯುತ
ಒಲವ ಎರೆಯುತ
ನೀಡಲಿ ಮನಕೆ ತಂಪನು!

ಜೀವನ ಜಂಜಾಟ!

ಕನಸುಗಳೇ ಕಾಲೆಳೆಯುವಾಗ
ಕವಿತೆಗಳ ಜನನ
ಕಾಗುಣಿತ ಬರೆದು ನಿಂತಾಗ
ಕಥೆಯಾಯ್ತು ಜೀವನ
ಒಲವಲ್ಲಿ ಮಿಂದು ಎದ್ದಾಗ
ಶುರುವಾಯ್ತು ಶ್ರಾವಣ
ಒಡನಾಟ ಗಟ್ಟಿಗೊಂಡಾಗ
ಪ್ರತಿ ಕ್ಷಣವು ಔತಣ

ರಾಗ ತಾಳ ಸೇರಿ
ಇಂಪಾದ ಗಾಯನ
ರಾತ್ರಿ ಹಗಲು ಜಾರಿ
ಕಳೆಯುವುದು ಪ್ರತಿದಿನ
ನವಿಲಿನ ನರ್ತನ
ಪ್ರಕೃತಿಗೆ ಭೂಷಣ
ನಗುವೆಂಬ ಸಾಧನ
ಗೆಲುವಿಗೆ ಪ್ರೇರಣ!

ರಮಿಸುವ ರಂಭೆ ಕಂಡರೆ
ಕೆರಳುವುದು ಕಾ-ಮನ
ಮನಸ್ಸಿಗೆ ರೆಕ್ಕೆ ಬಂದರೆ
ಕೈಗೆ ಸಿಗುವುದೇ ಗಗನ

ಮೂಡಣ- ಪಡುವಣ?
ಸಂಶಯದ ಪಯಣ
ಸಂಕಲನ -ವ್ಯವಕಲನ
ಕಲಿಯದಿದ್ದರೆ ಪತನ!
ಸತ್ತರೆ ಮರಣ
ಹುಟ್ಟಿದರೆ ಜನನ
ನಡುವಿನ ಜಂಜಾಟವೇ
ಈ ಜೀವನ! #SNG

-ಸೋಮೇಶ್ ನಿಂಗೇಗೌಡ

ನಗುವೇ ಜೀವನದ ಗುಟ್ಟು (ಹೊಸ ವರ್ಷಕ್ಕೆ ಹೊಸ ಕವನ)

ಎಲ್ಲಾ ಮರೆತು

ನಗುತಿರು ಮನವೇ

ನಗುವೇ ಜೀವನದ ಗುಟ್ಟು

ನೆಮ್ಮದಿ ಕಲಿತು

ಬಾಳು ಸುಖದಿ

ನಿನ್ನೊಳಗಿನ ಆಸೆಯ ಬಿಟ್ಟು

ಎಲ್ಲಾ ಕ್ಷಣಿಕ!

ಇಲ್ಯಾರು ಪ್ರಾಮಾಣಿಕ?

ನಲಿವಿಗೆ ನೊಗವನು ಕಟ್ಟು

ನಿನ್ನಲಿ ನೀನು

ಬದುಕಿದರೆ ಸಿಹಿ ಜೇನು

ಬೆಳೆಸು ಕನಸಿನ ಗಿಡ ನೆಟ್ಟು

ಗುರಿಯನು ಹಿಡಿದು

ಗುರು ಹಿರಿಯರ ನೆನೆದು

ಗೆಲುವಿನ ಬಾಗಿಲು ತಟ್ಟು

ಒಲವಿನ ದೋಣಿಲಿ

ಚಲಿಸುವ ನಿನಗೆ

ಪ್ರತಿದಿನವೂ ಹೊಸ ಹುಟ್ಟು!!

ಎಲ್ಲಾ ಮರೆತು ನಗುತಿರು ಮನವೇ

ನಗುವೇ ಜೀವನದ ಗುಟ್ಟು!.

ಅವಳೆಂಬುದೇ ಭ್ರಮೆ

ಒಲವಿರದೆ ಕಳೆದ ಸಮಯ
ಅವಳ ನೆನೆದು ನೊಂದ ಹೃದಯ
ಏನೋ ಹೇಳಿದೆ ನನ್ನನ್ನು ಕಾಡಿದೆ

ಬದುಕಲ್ಲಿ ನೋವು ಸಹಜ
ಅನುಭವಿಸಬೇಕು ಮನುಜ
ಯಾಕೀ ಯಾತನೆ ತಂದಿದೆ ನನ್ನಲ್ಲಿ ಚಿಂತನೆ

ಕನಸುಗಳ ಗೋಪುರ ಕಟ್ಟಿ
ಒಲವಿಗೆ ಅವಳ ಹೆಸರಿಟ್ಟಿ
ಎಲ್ಲ ಗೆದ್ದವನಂತೆ ಬೀಗಿದೆ
ಮಾಯವಾದಳು, ಕಾರಣವ ಹೇಳದೆ

ಪ್ರೀತಿ ಕೊಂದ ಪಾತಕಿ ಅವಳು
ಸುಳ್ಳು ಹೇಳಿದೊ ಅವಳ ಕಂಗಳು
ಅವಳೆಂಬುದೇ ಭ್ರಮೆ
ಮೋಸಕ್ಕಿಲ್ಲ ಎಂದೂ ಕ್ಷಮೆ!

ಬಾಳು ಬರೀ ಪರದಾಟ!

ಬೇಸತ್ತ ಮನಸ್ಸಿಗೆ

ಬೆಂಡೆಕಾಯಿ ಗೊಜ್ಜು

ಬೇವರ್ಸಿ ಹೃದಯಕ್ಕೆ

ಬೆಳ್ಳುಳ್ಳಿ ಜಜ್ಜು

ಕುಲಗೆಟ್ಟ ಕನಸಿಗೆ

ನಾಲ್ಕಾಣೆ ಸೆಂಟು

ಮೂರುಬಿಟ್ಟ ಮುನಿಯನಿಗೆ

ಊರೆಲ್ಲಾ ನೆಂಟು

ಏನೈತೆ ಬದುಕಲ್ಲಿ

ನೀನೇಳೋ ತಮ್ಮ

ಬರೆದಿಟ್ಟು ಹಾಯಾಗಿ

ಮಲಗಿಹನು ಬ್ರಹ್ಮ

ಹುಡುಕಾಡು ಹುಡುಕಾಡು

ಬಾಳೆಲ್ಲಾ ಕಾದಾಡು

ಗೆದ್ದರೆ ಕುಣಿದಾಡು

ಸೋತರೆ ಮತ್ತೆ ಆಡು

ಬಾಳು ಬರೀ ಪರದಾಟ

ಕಲಿಸುವುದು ದಿನವೂ ಪಾಠ

ಬಿಡಬೇಡ ಛಲವನ್ನು

ತುಳಿಬೇಡ ಯಾರನ್ನು

ಮರಿಬೇಡ ನಿನ್ನನ್ನು

ಸಲುಹಿದ ಜನರನ್ನು

ನೀ ಮಾಡಿದ್ದೆ ನಿನಗೆ

ನಗುವಿರಲಿ ಕೊನೆವರೆಗೆ J