Sunday 1 July 2018

ಒಲವಿಗಿದೆ ಇಲ್ಲಿ ಅಭಾವ!

ಉಣಬಡಿಸು ತಂದೆ ಒಲವನ್ನೊಂದೆ
ಒಲವಿಗಿದೆ ಇಲ್ಲಿ ಅಭಾವ!

ಮಕ್ಕಳಿಗಿಲ್ಲ ಇಂದು ತಂದೆ-ತಾಯಿಯಲಿ ಪ್ರೀತಿ
ಗಂಡ ಹೆಂಡಿರ ನಡುವೆ ವಿರಹದ್ದೇ ಭೀತಿ
ಸ್ನೇಹದಲಿ ಸಂಘರ್ಷ -ಪ್ರೇಮದಲ್ಲೂ ಮೋಸ
ಎಲ್ಲಿ ಹೋದರೆ ಅಲ್ಲಿ ಸ್ವಾರ್ಥದ್ದೆ ನಿವಾಸ!

ಉಣಬಡಿಸು ತಂದೆ ಒಲವನ್ನೊಂದೆ
ಒಲವಿಗಿದೆ ಇಲ್ಲಿ ಅಭಾವ!

ಮುಳುಗಿಹರೆಲ್ಲರು ಹಣದ ಅಮಲಿನಲ್ಲಿ
ಅರಮನೆಯೇ ಬೇಕೆಂಬ ಆಸೆ ಯಾರಿಗಿಲ್ಲ ಇಲ್ಲಿ?
ಕನಸನ್ನು ಕೊಳ್ಳುವರು ವಯಸ್ಸನ್ನು ತಳ್ಳುವರು
ಮನಸು ಕುಣಿಸಿದ ಹಾಗೆ ಹುಚ್ಚೆದ್ದು ಕುಣಿಯುವರು

ಉಣಬಡಿಸು ತಂದೆ ಒಲವನ್ನೊಂದೆ
ಒಲವಿಗಿದೆ ಇಲ್ಲಿ ಅಭಾವ!

ತನ್ನನ್ನೆ ತಾ ಮರೆತು ಬೇರೊಬ್ಬರ ಜೊತೆ ಬೆರೆತು
ಸ್ವಾಭಿಮಾನವನು ಮಾರಿದವರೆಷ್ಟೋ?
ಪ್ರತಿಷ್ಟೆಗೆ ಹಸಿದು ನಿಷ್ಠೆಯನು ತೊರೆದು
ಎಲ್ಲ ಗೆದ್ದವರಂತೆ ಮೆರೆದವರೆಷ್ಟೋ?

ಉಣಬಡಿಸು ತಂದೆ ಒಲವನ್ನೊಂದೆ
ಒಲವಿಗಿದೆ ಇಲ್ಲಿ ಅಭಾವ