ಅವ ಮುದ್ದಾಡಿದ

ಅವ ಮುದ್ದಾಡಿದ
ತಣ್ಣನೆ ಗಾಳಿಲಿ ಕಚಗುಳಿಯಿಡುತ
ಅಕ್ಕರೆಯ ಮಾತಿನಲೇ ಕವಿತೆಗಳ ಗೀಚುತ
ಹಾಡುವ ದ್ವನಿಯಲ್ಲಿ ನನ್ನೆಸರ ಕೂಗುತ
ಮೋಡಗಳ ಮರೆಯಲ್ಲಿ ನನ್ನನ್ನು ತಬ್ಬುತ

ಅವ ಮುದ್ದಾಡಿದ
ಪ್ರೇಮದ ಒಳಗಿರೋ ಪುಷ್ಪವ ತೋರಿಸಿ
ಪ್ರೀತಿಯ ಮುಕುಟಕೆ ನನ್ನನೆ ಹೋಲಿಸಿ
ನೋಟವ ಬೆರೆಸಿ,ಭಯವನು ಸರಿಸಿ
ಒಲವಲಿ ಬದುಕುವ ಸೂತ್ರವ ಕಲಿಸಿ

ಅವ ಮುದ್ದಾಡಿದ
ಹೃದಯವು ನಾಚುವ ನರ್ತನ ಮಾಡಿ
ಚಿಲಿಪಿಲಿ ಹಕ್ಕಿಯ ಜೊತೆಯಲಿ ಕೂಡಿ
ತರ ತರ ಹೂಗಳ ಎರಚುತ ಹಾಡಿ
ಈ ಹೃದಯಕೆ ಮಾಡುತ ಪ್ರೀತಿಯ ಮೋಡಿ

ಅವ ಮುದ್ದಾಡಿದ..!!!

-ಸೋಮೇಶ್ ಎನ್ ಗೌಡ

ಗದ್ದೆ ಪಕ್ಕದ ಹೊಲದಲ್ಲಿ

ಗದ್ದೆ ಪಕ್ಕದ ಹೊಲದಲ್ಲಿ
ಉದ್ದುದ್ದ ನಿಂತಿದ್ದ ಜೋಳದ ನಡುವಲ್ಲಿ
ಮುದ್ದಾಡಿ ಹೋದವನ
ನೆನಪೇಕೋ ಇಂದು
ಈ ಪೆದ್ಡಿ ಮನದಲ್ಲಿ
ಗಿರಗಿಟ್ಲೆ ಹೊಡೆಯುತ್ತಿದೆ

ಮಂಜು ಮಂಜಿನ ಮುಸುಕಲ್ಲಿ
ಅಂಜುತ್ತಾ ನಿಂತಿದ್ದ ನನ್ನಯ ಎದೆಯಲ್ಲಿ
ಮತ್ತೇರಿಸಿ ಹೋದ
ನನ್ನಯ ನಲ್ಲನ
ನೆನಪುಗಳೇಕೋ ಇಂದು
ನನ್ನ ಕಾಡುತ್ತಿವೆ

ಓಡೋಡಿ ಬಂದು ಕೆಸರಲ್ಲಿ
ಮಲ್ಲಿಗೆ ಇಟ್ಟು ಮುಡಿಯಲ್ಲಿ
ಪರಿಮಳವ ಹೀರುತ್ತಾ
ಕಣ್ಣಲ್ಲೇ ಕುಕ್ಕುತ್ತಾ
ನನ್ನ ಮೌನಿ ಮಾಡಿದವನ
ನೆನಪುಗಳಿಂದು
ಎಡೆಬಿಡದೆ ಕೆಣಕುತ್ತಿವೆ..
ಕೇಳು ಏಕೆಂದು??

  ಸೋಮೇಶ್ ಎನ್ ಗೌಡ

ತಬ್ಬಿದೆ ನಿನ್ನ ಮಬ್ಬಿನ ಹೊತ್ತಲಿ

ತಬ್ಬಿದೆ ನಾ ನಿನ್ನ ಮಬ್ಬಿನ ಹೊತ್ತಲಿ
ಎದೆಯೊಳಗೆ ಏನೋ ಪುಳಕ
ಹಬ್ಬದ ಸಡಗರ ಶುರುವಾಯ್ತು ಎದೆಯಲಿ
ನಿನ್ನೊಳಗೇನಿದೆ ಕೇಳೋ ತವಕ

 ಕಂಚಿನ ಸೀರೆ ಉಟ್ಟು ಮಿಂಚುತ್ತಾ ಬರ್ತಿದ್ರೆ ನೀನು
ಅಂಚಿನಲ್ಲಿ ಒಮ್ಮೆ ಹಾದು ಹೋಗಲೇಬೇಕು ನಾನು
ನಿನ್ನ ಮುಡಿಯಲ್ಲಿ ಮಲ್ಲಿಗೆ ಹೂವ ಕಂಡಿದ್ದೆ ಆದ್ರೆ ನಾನು
ಹೀರಲೇಬೇಕು  ಅದರ ಪರಿಮಳವನ್ನು

ನೀನು ನಾಚುತ್ತಾ ನಾಚುತ್ತಾ ರಂಗೋಲಿ ಹಾಕ್ತಿದ್ರೆ
ನವಿಲೆ ರೆಕ್ಕೆ ಬಿಚ್ಚಿ ಕುಣಿದಾಡ್ತಂತೆ ನನಗೆ
ನೀ ಬೆಕ್ಕ ನೋಡಿ ಬೆಚ್ಚಿ ಬಿದ್ದು ಮನೆಯೊಳಗೆ ಓಡ್ತಿದ್ರೆ
ಒಳಗೊಳಗೆ ಯಾರೋ ಕಚಗುಳಿ ಇಟ್ಟ೦ತೆ ಎನಗೆ

                   ಸೋಮೇಶ್ ಎನ್ ಗೌಡ

ಎತ್ತ ಹೋಗುತ್ತಿದೆಯೋ ಹುಚ್ಚು ಖೊಡಿ ಮನಸ್ಸು

ಹುಚ್ಚು ಖೊಡಿ ಮನಸ್ಸು
ಎತ್ತ ಹೋಗುತ್ತಿದೆಯೋ
ಬೆತ್ತಲಾಗಿದೆ,ಕತ್ತಲಲ್ಲಿದೆ
ಹುತ್ತದ ಒಳಗೂ ಕೈಯ ಹಾಕುತ್ತದೆ

ಹುಚ್ಚು ಖೊಡಿ ಮನಸ್ಸು
ಎತ್ತ ಹೋಗುತ್ತಿದೆಯೋ
ಬೆಚ್ಚಿ ಬೀಳುವ ಸ್ವಭಾವ ವಾದರು
ಮಚ್ಚನು ಹಿಡಿವುದ ಬಿಡುವುದೇ ಇಲ್ಲ
ಕೊಚ್ಚೆಯಲ್ಲೂ ರೂಪಾಯಿ ಕಂಡರೆ
ಎತ್ತಿ ಮಡಿಚುವುದ ಮರೆವುದೇ ಇಲ್ಲ

ಹುಚ್ಚು ಖೊಡಿ ಮನಸ್ಸು
ಎತ್ತ ಹೋಗುತ್ತಿದೆಯೋ
ಮಿಣ ಮಿಣ  ಮಿಂಚುವ ಬಟ್ಟೆಯ ತೊಟ್ಟರು
ತರ ತರ ಆಸೆಗೆ ತಲೆ ಬಗ್ಗುವುದಿದುವೆ
ಲಕ ಲಕ ಹೊಳೆಯುವ ಸುಂದರಿ ಕಂಡರೆ
ತಕ ತಕ ಎಂದು ಕುಣಿವುದು ಇದುವೇ

ಹುಚ್ಚು ಖೊಡಿಮನಸ್ಸು
ಎತ್ತ ಹೋಗುತ್ತಿದೆಯೋ!!!

     -ಸೋಮೇಶ್ ಎನ್ ಗೌಡ

ಮನದರಮನೆಯ ಮಾಂತ್ರಿಕ

ಮನದರಮನೆಯ ಒಳಗಿನಿಂದ
ಬಂದನೊಬ್ಬ ಮಾಂತ್ರಿಕ
ಪಿಸುಮಾತೊಂದ ಹೇಳುವೆನೆಂದು
ಮುತ್ತನು ಕೊಟ್ಟ ರಸಿಕ

ಮಲ್ಲಿಗೆ ಹೂವನು ಮುಡಿಯಲು ಕೊಟ್ಟ
ಮೋಹಕ ಮೋಸವ ಮಾಡಿಯೇ ಬಿಟ್ಟ
ಮೆಲ್ಲಗೆ ಹತ್ತಿರ ಬಂದು ಗಲ್ಲಕೆ
ಇಟ್ಟನು ಕಪ್ಪು ಚುಕ್ಕೆಯನು

ಪ್ರೇಮದ ಮಂತ್ರವ ಜಪಿಸಲು ಹೇಳಿ
ನನ್ನಯ ಮೊಗವನು ನೋಡುತ ನಿಂತನು ಬಾಗಿ
ಆರದ ದೀಪವ ಇಟ್ಟು ಮುಂದೆ
ಕಲ್ಲಾದನು ನನ್ನ ಎದುರು ಅಂದೇ.|

   -ಸೋಮೇಶ್ ಎನ್ ಗೌಡ

ಮೋಹಕ ಬಲೆ

ಮೋಹಕ ಬಲೆಯ ಬೀಸಿ ಹಿಡಿದೆ ಬಿಟ್ಟಳು ನನ್ನ
ಪ್ರೇಮದ ಆಸೆ ತೋರಿಸಿ ಸೂರೆ ಮಾಡಿದಳು ನನ್ನ

ಅವಳ ಕವನ, ನಾ ಅವಳೀಗೆ ಮದನ
ಪ್ರೀತಿ ಎಂದರೆ ಹೀಗೇನಾ
ನಾಚುತಿದೆ ನನ್ನ ಈ ಮನ
ಹೇಳಾಲಾಗದೆ ಅವಳ ಹೆಸರನ್ನ  | ಮೋಹಕ!

ದಾರಿ ತುಂಬಾ ಅವಳದೇ ಕೂಗು
ಹೃದಯದಲ್ಲಿ ಅರಳಿದೆ ಪ್ರೀತಿ ಮೊಗ್ಗು
ಕಣ್ಣ ಮುಚ್ಚಿದರು ನಿದ್ದೆಯೇ ಬಾರದು
ಅವಳ ನೆನಪುಗಳು ನನ್ನ ಬಿಟ್ಟು ಹೋಗದು

ಕಾತರ, ನಮ್ಮ ಪ್ರೀತಿ ಮರ
ಬೆಳೆಯುವುದೇ ಬಲು ಗಡಸಾಗಿ
ತರ ತರ ಕನಸುಗಳು
ಬೆಳೆಯುತ್ತಿವೆ ಮನದಲಿ ಹುಲುಸಾಗಿ | ಮೋಹಕ!

                     - ಸೋಮೇಶ್ ಎನ್ ಗೌಡ